Бүгінде 20 мыңнан астам адам курстан сәтті өтті.
Курс бағдарламасы 3 модульден және 10 жеке тақырыптан тұрады, деп хабарлайды Almaty-akshamy.kz
Сыбайлас жемқорлыққа қарсы қызмет қоғамда жемқорлыққа қарсы мәдениетті қалыптастыру шеңберінде «Documentolog Global Limited» компаниясымен және М.С. Нәрікбаев атындағы ҚазГЗУ университетімен бірлесе мемлекеттік қызметкерлерге арналған жемқорлыққа қарсы онлайн оқу курсын әзірледі.
Курстың мақсаты – жемқорлыққа мүлдем төзбеушілікті қалыптастыру, сондай-ақ мемлекеттік қызметкерлерді жемқорлық тәжірибелері, олардың салдары және алдын алу әдістемелері туралы жүйелі біліммен қамтамасыз ету.
Бұл курс «Documentolog» ақпараттық жүйесінде өтеді. Ол осы платформаға қол жеткізе алатын барлық мемлекеттік қызметкерлерді қамтуға мүмкіндік береді.
«Documentolog» АЖ – бұл мемлекеттік қызметкерлер, сондай-ақ квазимемлекеттік және жеке сектор субъектілерінің қызметкерлері күнделікті пайдаланатын электрондық құжат айналымы жүйесі.
Курс бағдарламасы 3 модульден және 10 жеке тақырыптан тұрады. Оқу материалдары схемалар, жадынамалар және интерактивті презентациялар форматында қысқаша мәтіндік баяндамалар түрінде ұсынылған.
Курс заңдар мен нормативтерді түсінуді, жемқорлыққа қарсы мінез-құлықты енгізуді, құралдарды меңгеруді қамтитын жемқорлыққа қарсы нормалар мен мінез-құлықтарды оқытуға тұтас көзқарасты ұсынады.
Сонымен қатар, қазір мемлекеттік қызметкерлерді жемқорлыққа қарсы оқыту жыл сайын 10 мыңға жуық мемлекеттік қызметкерді қамти отырып, ҚР Президенті жанындағы Мемлекеттік басқару академиясының базасында қайта даярлау және біліктілігін арттыру шеңберінде жүргізіледі.
Агенттік әзірлеген онлайн курс барлық мемлекеттік қызметкерлерді жұмыс процестерінен қол үзбей, жемқорлыққа қарсы біліммен уақтылы қамтуға мүмкіндік береді. Алдағы уақытта бұл курсты ұлттық компанияларда, квазимемлекеттік және жеке ұйымдарда тарату жоспарланып отыр.