Мемлекет басшысының жол саласындағы жемқорлықты жою жөніндегі тапсырмасын орындау мақсатында Сыбайлас жемқорлыққа қарсы іс-қимыл агенттігі мен Көлік министрлігі бірлесіп жол құрылысы саласындағы жемқорлық тәуекелдеріне сыртқы талдау жүргізетін болады6 деп хабарлайды аlmaty-akshamy.kz.
Сыбайлас жемқорлыққа қарсы іс-қимыл агенттігінің Төрағасы Асхат Жұмағали мен Көлік министрі Марат Қарабаев ағымдағы жылдың 10 маусымында өткен бірлескен кеңесте талдау барысында шешілуі қажет өзекті мәселелер мен міндеттерді талқылады.
Соңғы 3,5 жылда Сыбайлас жемқорлыққа қарсы қызмет 64 жемқорлық құқық бұзушылықты тіркеп, 70 адамды әшкереледі. Бұл әрекеттердің салдарынан мемлекетке 8,8 миллиард теңге залал келтірілді, оның ішінде 38 адам сотталды. Негізгі қылмыстар парақорлық, жымқыру және лауазымдық өкілеттіктерді теріс пайдалану фактілерімен байланысты.
Асхат Жұмағалидің айтуынша, "Жол жұмыстары сапасының төмендігі құрылыстың барлық кезеңдерінде, соның ішінде бюджеттік жоспарлау, жобалау, сметалық жоспарлау, жобалық-сметалық құжаттаманың мемлекеттік сараптамасы, техникалық қадағалау, қабылдау және пайдалануды бақылау кезеңдерінде жүйелі жемқорлық тәуекелдерімен байланысты."
Мемлекет басшысының тапсырмалары аясында жол саласына бөлінген барлық қаражатты жоспарлау және жұмсау үдерістері мұқият зерделенетін болады. Сондай-ақ, жол құрылысының халықаралық тәжірибесі, атап айтқанда, Гонконг, Сингапур және Қытай елдерінің тәжірибесі талданады. Талдау нәтижелері бойынша жол құрылысының барлық кезеңдерінде жемқорлық тәуекелдерін жою және алдын алу шаралары қабылданады. Ғылыми қауымдастықпен бірлесіп құрылыстың жаңа технологияларын енгізу тетіктері әзірленіп, ұсынылатын болады.
Кездесу қорытындысы бойынша тараптар жол құрылысы саласындағы жағдайды жақсарту бойынша кешенді шараларды белгіледі.