Экс-жайдарманшы Айбек Байназаров бейтаныс қызға жасаған орынсыз әрекетін әзіл ретінде баяндап, қоғам наразылығын тудырды, деп хабарлайды Aqshamnews.kz тілшісі.
Ол бұл оқиға туралы әзілкеш Дархан Оспанов жүргізетін «Шай әңгіме» YouTube шоуында айтып берген. Айтуынша, жас кезінде пойызда мас күйде бейтаныс бойжеткенге тиіскен. Сұхбаттың үзіндісі кейін Threads әлеуметтік желісінде тарады.
Желі қолданушыларының айтуынша, Айбек Байназаров болған жағдайды өкінішпен емес, керісінше әзілге айналдырып жеткізген. Студиядағы жүргізуші мен қонақтардың да әңгімені тоқтатпай, күлкімен қабылдауы көпшіліктің наразылығын күшейтті.
Бейнежазба әлеуметтік желіде кеңінен талқыланып, резонанс тудырды. Қолданушылар Айбек Байназаровтың сөзін де, оны тоқтатпаған жүргізуші Дархан Оспановты да сынға алды. Көпшілік мұндай әңгімелердің зорлық-зомбылық пен харассментті қалыпты жағдай ретінде көрсетуі қауіпті екенін атап өтті.
Әйелдер қауымы пойыздар мен қоғамдық орындарда орын алған осындай оқиғалардан алған психологиялық соққылары туралы пікірлерін бөлісе бастады.
Осыдан кейін Дархан Оспанов түсірілім мен монтаж барысында әңгіменің ауыр контекстіне мән бермей қалғанын айтып, кешірім сұрады. Алайда бұл мәлімдеме желі қолданушыларының ашуын баса алмады. Көп ұзамай «Шай әңгіме» бағдарламасының аталған шығарылымы YouTube платформасынан өшірілді.
Еске салайық, 2018 жылы «Тальго» пойызында болған зорлық оқиғасы Қазақстан қоғамында үлкен резонанс тудырған еді.