Аяғын шалыс басып қылмыс жасағандарды қоғамға пайдалы адам ретінде қайтарудың бірден бір тиімді жолы – жұмысқа орналастыру. Бұл орайда Алматы қаласы бойынша ҚАЖД-нің қауіпсіздігі барынша төмен №13 мекемесінің әкімшілігі сотталғандарды жұмысқа орналастыру бағытында жүйелі жұмыс жүргізіп келеді, деп хабарлайды Аqshamnews.kz.
Мекемедегі сотталғандардың басым бөлігі бүгінгі нарық заманында табыстың көзін таппай әртүрлі қылмысқа ұрынып, бас бостандығынан айырылғандар. Осыны ескерген мекеме әкімшілігі қаладағы кәсіпорын басшыларымен келіссөздер жүргізіп, сотталғандарды жұмыспен қамтуда.
Мекеме әкімшілігінің осындай жұмыстарының нәтижесінде бүгінде 30 сотталған адам Алматы қаласындағы автоклавты газдалған бетон блок шығаратын «Автоклав kz» заводына жұмысқа орналастырылған.
Жуырда ҚР Конституциясының 30 жылдығына орай қабылданған “Рақымшылық туралы” заңының талаптарына сай аталған мекемеде жазасын өтеп жүргендер бостандыққа шығуда. Солардың бірі «Автоклав kz» заводында жұмыс істеп жүрген Ерхан деген жігіт. Ол ҚР Қылмыстық кодексінің 193-бабымен ерекше құндылығы бар, тарихи заттарды жымқырып, қылмыс жасағаны үшін 3 жыл 6 айға сотталған болатын. Еркіндікке шыққан соң да завод басшылығы Ерханның өзі еңбек етіп жүрген цехтағы жұмысын жалғастыруға ұсыныс жасап, ол қазір еселі еңбектің үлгісін көрсетіп жүр.