Америкалық блогер әрі консерватив белсенді Чарли Киркке Юта алқабы университетінде сөз сөйлеп тұрған сәтінде оқ атылды, - деп хабарлайды Аqshamnews.kz DW-ге сілтеме жасап.
Оқиға 10 қыркүйек, сәрсенбі күні болған.
Кирк мойнынан жарақат алып, ауруханаға жеткізілді.
"Бәріміз Чарли Кирк үшін дұға етуіміз керек. Ол керемет жан еді. Құдай жар болсын!" – деп оқиғаға АҚШ президенті Дональд Трамп Truth Social желісінде пікір білдірді.
Бірақ бірнеше сағаттан кейін Трамп Кирктің қаза тапқанын хабарлады.
"Ешкім АҚШ жастарын Чарлидей түсініп, сезіне алмады. Оны бәріміз, әсіресе мен, жақсы көріп, құрметтейтінбіз. Енді ол жоқ. Мелания екеуміз оның жары Эрикаға және бүкіл отбасына қайғырып көңіл айтамыз", – деді АҚШ президенті.
Белсендінің қазасынан кейін Ақ үй басшысы ел аумағындағы барлық жерде туды 14 қыркүйек, жексенбі кешіне дейін түсіруді тапсырды.
Бастапқыда полиция күдіктіні қолға түсіргенімен, кейін оның атыс жасаған адам емесін анықтады. Кейінірек FBI басшысы Кэш Пател Киркті өлтіру ісіне байланысты күдікті ұсталғанын мәлімдеді, бірақ оның аты-жөні жарияланған жоқ.
Чарли Кирк туралы не белгілі?
Чарли Кирк – Дональд Трамптың жақтасы, медиада жиі көрініп, түрлі оқу орындарында дәрістер мен пікірталастар өткізетін еді.
Айта кетейік, 2024 жылғы 14 шілдеде Дональд Трампқа да қастандық жасалған еді. Беймәлім біреу Пенсильвания штатында оның митингісі кезінде оқ атқан. Трамп құлағынан жарақат алып, бір қатысушы мен атыс бастаған адам қаза тапқан. Сондай-ақ сол жылдың 12 қыркүйегінде Флоридадағы гольф клубынан шыққан сәтінде Трампқа тағы оқ атылған. Кейін полиция клуб маңында шатыр тігіп, оны аңдып жүрген күдіктіні ұстаған.