Қазақстанның әр аймағынан 200-ден астам белсенді әйел «AMANAT» партиясының Әйелдер қанаты аясында ұйымдастырылған «Tomiris» көшбасшылық жобасының оқу курстарына қатысты. Мәжіліс Спикері және «AMANAT» партиясының Төрағасы Ерлан Қошанов олармен кездесіп, 6 қазанда өтетін атом электр станциясы туралы референдум мен Президент Жолдауының жүзеге асырылуын талқылады.
Ерлан Қошанов Мемлекет басшысы Қасым-Жомарт Тоқаевтың әйелдердің қоғамдағы рөлін әрдайым жоғары бағалайтынын және гендерлік теңдік пен отбасы құндылықтарын нығайту мәселелері Президент пен «AMANAT» партиясының басты назарында екенін атап өтті. Ол Әйелдер қанатының бір жарым жылда партияның қозғаушы күшіне айналғанын да айтты. Мысалы, отбасылық-тұрмыстық зорлық-зомбылыққа қатысты заңның қабылдануы Әйелдер қанатының бастамаларының бірі.
Кездесуде Мемлекет басшысының Жолдауы, әсіресе, елдегі энергия тапшылығы мәселесі де талқыланды. Ерлан Қошанов АЭС құрылысы еліміздің энергетикалық қауіпсіздігін қамтамасыз ету үшін маңызды екенін және қазақстандықтардың басым бөлігі бұл идеяны қолдап отырғанын атап өтті. Халықтық штаб мүшелері де өңірлерді аралап, тұрғындармен кездесіп, бейбіт атомды қолдау бойынша жұмыстар жүргізуде.
Ядролық физика институтының өкілдері Карлығаш Мұнасбаева мен Наталья Измайлова қауіпсіздік талаптарына сай соңғы технологияларды пайдалану арқылы АЭС салудың мүмкіндіктері туралы айтып өтті. Кәсіпкер Кенжетай Тазабекова референдумның «Халық үніне құлақ асатын мемлекет» тұжырымдамасының көрінісі екенін атап өтті.
Кездесу соңында партияның Әйелдер қанатының мүшелері АЭС құрылысына қолдау білдіріп, қазақстандықтарды референдумға белсенді қатысуға шақырды.