ІІМ "Қайрат" - "Реал" матчіндегі алыпсатарлар дауына қатысты түсініктеме берді, - деп хабарлайды Аqshamnews.kz. тілшісі Tengri Life-қа сілтеп.
Алматыда 30 қыркүйекте өткен футболдан УЕФА Чемпиондар лигасының "Қайрат" пен мадридтік "Реал" арасындағы ойынынан кейін әлеуметтік желілерде қызу талқылау өрбіді. Желі қолданушылары танымал қазақстандық әншілер Нұрлан Еспанов пен Сәкен Майғазиевтің ұлдарын билет спекуляциясына қатысы бар деп айыптады.
Желіде тараған хабарламаларға сәйкес, Нұрлан Еспановтың ұлы матч билеттерін 500-600 мың теңгеден сатқан-мыс. Кейін Сәкен Майғазиевтің ұлы да осындай хабарландыру жариялап, билеттерді 350 мың теңгеден ұсынғаны жайлы ақпарат шықты.
Бұл жайт қоғамда резонанс тудырып, билеттердің қолжетімділігі мен адал сатылымына қатысты сұрақтар көбейді.
ІІМ: тексеру үшін ресми шағым қажет
Мәжіліс кулуарында журналистер ішкі істер министрінің орынбасары Санжар Әділовтан осы мәселеге байланысты түсініктеме сұрады.
"Мен бұл ақпаратты сіздерден естіп тұрмын. Егер ресми өтініш түссе, біз міндетті түрде тексеру жүргіземіз. Қажетті процессуалдық шешім қабылданады", - деді Әділов.
Ол сонымен бірге әлеуметтік желілердегі шағымдарды көрмегенін, бірақ азаматтардан ресми түрде өтініш түскен жағдайда құқық қорғау органдары "міндетті түрде тексеру шараларын жүргізуге дайын" екенін айтты.