Қазақстан құрамасы Черногорияның Будва қаласында өткен бокстан жастар арасындағы әлем чемпионатында тарихи жеңіске қол жеткізді, деп хабарлайды aqshamnews.kz
Будвада өткен жастар арасындағы әлем чемпионатында қазақстандық боксшылар 6 алтын медаль иеленіп, бұрынғы рекордтарды жаңартты. Бұған дейін Қазақстан құрама командасы ең көп дегенде 2 алтын медальға ие болған еді: 2018 жылы Венгрияда және 2021 жылы Германияда өткен жарыстарда еліміз 2 алтынмен оралған болатын. Ал осы чемпионатта Қазақстанның әнұраны 6 рет шырқалды. Ақтық сынның алғашқы күнінде 67 келідегі құрама капитаны Төрехан Сабырхан, 75 келі салмақта Санжарәлі Бегалиев және 81 келіде Аружан Зейноллаева алтын медаль еншілесе, екінші финал күні 51 келідегі Боранбек Бексұлтан, 71 келідегі Өнер Сейілхан және 50 келідегі Елянұр Тұрғанова чемпион атанды.
Жалпы есепте 17 медальмен бірінші орынды иеленген Қазақстан құрамасының қоржынында 6 алтын, 1 күміс және 10 қола медаль бар. Екінші орынға Өзбекстан құрамасы жайғасса, үздік үштікті Ресей боксшылары түйіндеп тұр.
Сонымен қатар, Халықаралық бокс қауымдастығы жеңімпаздар мен жүлдегерлерге ақшалай сыйақы тағайындады: алтын медаль иегерлеріне – 8 мың доллар, күміс медаль иегерлеріне – 4 мың доллар, қола медаль иегерлеріне 2 мың доллардан табыстады.