Алматыда қала күніне орайластырылған «Алматы – мәдениет пен өнердің орталығы» атты қалалық макеттер байқауы басталады, – деп хабарлайды aqshamnews.kz тілшісі.
Байқауға сүйікті мегаполисінің келбетін өзінше көркем пайымдап, шығармашылық туындысын ұсынуға дайын 1–9 сынып оқушылары шақырылады.
Байқауды ұйымдастырушы — Білім берудегі жаңа технологиялардың қалалық ғылыми-әдістемелік орталығы (ГНМЦНТО). Байқаудың басты мақсаты — өскелең ұрпақтың шығармашылық қабілеттерін қолдау, туған қалаға деген сүйіспеншілігін арттыру және оның тарихи-мәдени мұрасын кеңінен насихаттау.
Алматыға шығармашылық көзқарас
Қатысушыларға Алматының келбетін бейнелейтін көлемді макеттер жасау ұсынылады. Олар тарихи ескерткіштерден бастап, болашақтың футуристік бейнесіне дейінгі түрлі идеяларды қамтуы мүмкін. Жұмыстар жеті номинацияның бірінде орындалуы тиіс. Олардың қатарында: «Тарихи Алматы», «Заманауи Алматы», «Алматы – жасыл қала», «Болашақ Алматы», «Алматының ұлттық нақышы» және тағы басқа номинациялар бар.
Макеттерді картон, ағаш, мата, ермексаз, табиғи немесе қайта өңделетін материалдар сияқты кез келген қауіпсіз материалдардан жасауға болады. Негізгі талаптар — авторлық идеяның болуы, жұмыстың өз бетінше орындалуы (жетекшінің кеңес беру көмегіне жол беріледі) және байқау тақырыбына сәйкестігі. Жұмыстың ұсынылатын өлшемі — 50×50 см-ден аспауы, биіктігі — 50 см-ге дейін.
Байқау кезеңдері
Байқау үш кезеңде өтеді:
· Мектепішілік кезең: 2026 жылғы 7–9 қыркүйек аралығы.
· Аудандық кезең: 2026 жылғы 10–11 қыркүйек (аудандық білім бөлімдері өткізеді).
· Қалалық кезең: 2026 жылғы 14–18 қыркүйек аралығы.
Аудандық кезеңде екі жас санаты бойынша (1–4 сыныптар және 5–9 сыныптар) I және II орын иеленген жеңімпаздар финалға жолдама алады. Олардың жұмыстары мен өтінімдері 14 қыркүйекке дейін ұйымдастыру комитетіне мына мекенжай бойынша қабылданады: Алматы қаласы, Қалдаяқов көшесі, 62, 306-кабинет.
Бағалау критерийлері және марапаттар
Кәсіби қазылар алқасы жұмыстарды бес негізгі критерий бойынша бағалайды: тақырыпқа сәйкестігі, идеяның ерекшелігі, техникалық шеберлігі, композициялық шешімі және авторлық даралығы. Макет үшін берілетін ең жоғары баға — 50 балл.
Әр жас санаты бойынша жеңімпаздар I, II және III дәрежелі дипломдармен марапатталады. Сонымен қатар арнайы номинациялар бойынша да жүлделер тағайындалады: «Үздік макет», «Шығармашылық идея», «Техникалық шеберлік», «Жас сәулетші», «Эко-идея», «Ұлттық нақыш» және «Көрермен көзайымы».
Маңызды талаптар
Ұйымдастырушылар байқауға ұсынылған жұмыстардың қайтарылмайтынын және оларды көрмелер ұйымдастыру, әлеуметтік желілерде жариялау, сондай-ақ орталықтың ақпараттық материалдарында пайдалану мақсатында қолдануға болатынын еске салады. Байқау ережелеріне сәйкес келмейтін немесе өзге авторлардың үлгілерін толық қайталайтын жұмыстар конкурсқа жіберілмейді.
Алматының жас таланттарын қиялы мен шеберлігін шыңдап, туған қаламыздың қайталанбас бейнесін бірге жасауға шақырамыз!
Анықтама үшін телефондар: 8 (727) 248-54-38, 351-30-37.
Байланыс тұлғасы: Баймахамбетова А.Н.