Алматы қаласының Түрксіб ауданындағы «Желтоқсан» саябағында 2 мыңға жуық адамның қатысуымен жалпықалалық сенбілік өтті, – деп хабарлайды aqshamnews.kz тілшісі.
Іс-шараға аудан тұрғындары, еріктілер, жастар ұйымдарының өкілдері, мемлекеттік мекемелер мен кәсіпорын қызметкерлері белсенді түрде қатысты.
«Қатысушылар саябақ аумағын тазалау, көріктендіру және көгалдандыру жұмыстарын қарқынды жүргізді. Сондай-ақ коммуналдық техника жұмылдырылды», — деді Түрксіб ауданы әкімінің орынбасары Ермек Әміров.
Сенбілік барысында қоқыс жиналып, құрғақ шөптер мен бұтақтар тазартылды, ағаштар әктеліп, жасыл желектерге күтім жасалды. Жүргінші жолдары мен демалыс аймақтары ретке келтірілді.
Қалдықтарды шығару үшін 20 жүк көлігі мен 10 тиегіш техника тартылды.
Сенбілікке қатысқан Алматы қаласы мәслихатының депутаты Дулат Рамазанов мұндай іс-шаралардың маңызын атап өтті: «“Таза Қазақстан” науқаны аясында осындай маңызды іс-шаралар өткізіліп келеді. “Бірлік бар жерде — тірлік бар” демекші, әрқайсымыз қаланың тазалығын сақтауға үлес қосуымыз қажет. Әсіресе жастардың экологиялық мәдениетінің жоғары болуы қуантады».
Жергілікті тұрғын Гүлнафиз Сарыбаева да бастаманы қолдап: «Жасымызға қарамастан, жастарға үлгі болу үшін осындай сенбіліктерге қатысуға тырысамыз. Елімізде әрдайым бейбітшілік пен береке болсын», — деді.
Сенбілік қорытындысы бойынша саябақ аумағы толықтай ретке келтірілді. Көріктендіу және санитарлық тазалау жұмыстары алдағы уақытта да жалғасады.