2026 жылдың алғашқы жартыжылдығында Алматы халықаралық туристік нарықтардағы ілгерілету жұмыстарын күшейтті, – деп хабарлайды aqshamnews.kz тілшісі. Бұл туралы қалалық Туризм басқармасының өкілдері айтты.
Негізгі нәтижелердің бірі Гуанчжоу қаласында өткен GITF-2026 халықаралық туристік көрмесіне қатысу болды. Көрме аясында ұйымдастырылған «Алматы қаласының туризм күні» барысында шетелдік серіктестермен ынтымақтастық туралы 22 меморандумға қол қойылды.
Құжаттар Алматыны халықаралық деңгейде ілгерілетуге, туристер легін арттыруға және жаңа туристік өнімдерді әзірлеуге бағытталған бірлескен жұмыстарды күшейтеді. Қол жеткізілген келісімдерді жүзеге асыру нәтижесінде 2027 жылдың соңына дейін Алматыға 110 мыңға дейін турист тарту жоспарланып отыр.
Бірінші жартыжылдықта Алматы өкілдері Үндістан, Қытай, Оңтүстік Корея және Гонконгта өткен ірі халықаралық туристік көрмелерге де қатысты. Осы алаңдарда шетелдік туроператорлармен, әуе компанияларымен, қонақүй желілерімен және салалық ұйымдармен жүздеген B2B-кездесу өткізілді.
Басқарма мәліметінше, бұл жұмыстар халықаралық ынтымақтастықты кеңейтуге, Алматының туристік әлеуетін насихаттауға және шетелдік туристер санын арттыруға бағытталған.