Алматы қалалық Төтенше жағдайлар департаментінің ұйымдастыруымен "Шымбұлақ" тау-шаңғы курорты аумағында шұғыл қызмет өкілдері мен альпинистік қауымдастық мүшелеріне арналған базалық жүрек-өкпе реанимациясы (BLS) бойынша оқу-тренинг, шебердің дәрісі өтті. Бұл туралы қалалық Қоғамдық денсаулық сақтау басқармасының өкілдері айтты.
Іс-шара қатысушылардың медицина қызметкерлері келгенге дейін төтенше әрі шұғыл жағдайда алғашқы көмек көрсетуге дайындығын арттыруға бағытталған.
Оқу бағдарламасын Жедел медициналық жәрдем қызметінің BLS нұсқаушылары Перизат Алдабергенова мен Аслан Шеринов жүргізді. Сабақ барысында олар жоғары кәсіби біліктілікті, оқу үдерісінің нақты ұйымдастырылуын және теориялық әрі тәжірибелік материалды сауатты жеткізе білуді айқын көрсетті.
Аяқ-қол сынуы, бас жарақаттары, оларды дер кезінде анықтау жолдары, алғашқы көмек көрсету алгоритмдері мен зардап шеккендерді дұрыс бекіту тәсілдері қатысушылардың ерекше қызығушылығын тудырды. Сонымен қатар құрысу ұстамалары мен өзге де шұғыл жағдайда атқарылатын іс-қимылдар жан-жақты талқыланды.
"Мұндай оқу-жаттығу шаралары таулы аймақтағы қауіпсіздік деңгейін арттыруға және шұғыл қызметтер мен белсенді спорт түрлерімен айналысатын қауым арасындағы өзара ынтымақтастықты нығайтуға септігін тигізеді", – деді Алматы қалалық Қоғамдық денсаулық сақтау басқармасының өкілдері.