Мемлекеттік қуыршақ театры ересек көрермендеріне арнап «Мен кіммін?» спектаклінің премьерасын ұсынды. Айтар ойы терең ерекше қойылым адам жанының құпия әлемінен сыр шертеді.
Қоғамдағы рухани жалғыздық, адамдық келбетті жоғалту, өз-өзімен арпалысу секілді ішкі қайшылықтарды, адам жанының күйзеліске ұшырауын қаузайтын спектакль мазмұны қуыршақ өнерінің мүмкіндіктері арқылы сәтті баяндалды деуге болады. Басты кейіпкердің ішкі жан айқайы, қоғаммен үйлесім таба алмауы және өзін-өзі тануға ұмтылысы көрерменін терең ойға жетелейді.
Иә, адамның рухани дағдарысқа ұшырауын, оның өзін көптің ішінен таба алмай аласұрған ахуалын көркем түрде жеткізе білген «Мен кіммін?» спектаклінің режиссері – әлемдік қуыршақ театры өнерінде өзіндік қолтаңбасы қалыптасқан, Гүржістан елінен арнайы шақыртылған суреткер Николоз Сабашвили.
"Мен кіммін?» – қазіргі қоғамдағы өзекті тақырыптарды көтеретін, көрермен сұранысына сай спектакль деп ойлаймын. Біз бұл туынды арқылы адамдық болмыстың мәніне қайта үңілуді үндейміз. Қуыршақ театры – тек балаларға арналған өнер емес, ол кез келген күрделі идеяны нәзік әрі терең жеткізе алатын сахналық тіл. Премьера көрерменге ерекше әсер, терең ой және рухани толғаныс сыйлады деп сенеміз", – дейді Мемлекеттік қуыршақ театрының директоры Алмат Амангелді.
Спектакль соңында қуыршақ-кейіпкерлерді шебер ойната білген артистерге Алматы қаласының әкімдігі атынан ықылас гүлі табысталды. Ал Николоз Сабашвилидің иығына театр ұжымы қазақы жолмен шапан жапты.
"Біріншіден, 90 жылдық белестен өткен Қуыршақ театрының күні кеше ғана «академиялық» мәртебесін иеленген қуанышымен құттықтаймын. Жалпы, бүгінгідей терең ойлы, жоғары деңгейдегі жұмыстар осылай академиялық жұдырық болып жұмылған сәтте, яғни біріңіз қуыршақтың аяқ-қолын, екіншіңіз басын, көзін, үшіншіңіз ойын «сөйлетіп» жатқан кезде шығады ғой. Бір спектакльдің өне бойында қаншама әріптесімнің кәсіби шеберлігі, жанкешті еңбегі, маңдай тері жатыр десеңізші! Премьера құтты болсын!" – деді М.Әуезов атындағы Қазақ ұлттық драма театрының директоры Еркін Жуасбек.