Алматы әкімі Ерболат Досаев Наурызбай ауданы тұрғындарымен кездесуде 2024 жылғы ауданның әлеуметтік-экономикалық даму қорытындысы оның экономикасының оң динамика көрсеткенін атап өтті, деп хабарлайды aqshamnews.kz
Қала басшысының айтуынша, 2024 жылы Наурызбай ауданы Алматыдағы барлық аудан ішінде өңдеу өнеркәсібінің ең жоғары өсімін – 28,3% көрсетті. Құрылыс жұмыстарының көлемі 6% өсіп, 90 млрд теңгеге жетті. Негізгі капиталға салынған инвестиция 172,7 млрд теңге болып, өткен жылмен салыстырғанда 17,8% артты.
Ауданда шағын және орта бизнес те қарқынды дамып келеді: 25 мың белсенді ШОБ субъектісі салық түсімінің 46% өсуін және 5,4 мың жаңа жұмыс орнының құрылуын қамтамасыз етті. Аудан бюджеті де айтарлықтай ұлғайып, 2024 жылы 60% өсіп, 22,6 млрд теңге болды. 2025 жылы ол тағы 5% артып, 23,4 млрд теңгеге жетті.
Ерболат Досаев 2025 жылы жұмыстың негізгі бағыты инженерлік инфрақұрылымды одан әрі жаңғыртуға, әлеуметтік нысандар салуға, көлік қолжетімділігін жақсартуға және қоғамдық кеңістіктерді құруға бағытталатынын атап өтті.