Көктем келісімен Алматының Медеу ауданында аумақтарды жаңарту мен көріктендіру жұмыстары қарқынды түрде жүргізіліп жатыр. Қыс мезгілінен кейін көшелерде, саябақтар мен аллеяларда орналасқан орындықтар, қоқыс жәшіктері, баспалдақтар, жарық тіректері және өзге де инфрақұрылым нысандары кезең-кезеңімен сырланып, ретке келтірілуде, – деп хабарлайды aqshamnews.kz тілшісі.
Бұл жұмыстар қоғамдық кеңістіктердің келбетін жақсартуға, санитарлық жағдайды сақтауға және тұрғындар үшін жайлы орта қалыптастыруға бағытталған.
Аудан тұрғындары да оң өзгеріске дән риза. 51 жастағы тұрғын Шара Тұнғанова күн сайын немересімен саябақта серуендейтінін айтып, атқарылып жатқан жұмыстарға ризашылық білдірді.
«Таңертең немереммен саябақта серуендегенді жақсы көремін. Оның әрдайым таза әрі күтімді болғаны көңіл қуантады. Барлығы уақытында жаңартылып, ретке келтіріліп тұрады. Бұрын өзіміз де сенбілікке шығып, тазалау мен сырлау жұмыстарына қатысатын едік. Сондықтан мұндай еңбектің қадірін жақсы білемін. Ауданымызға жасалып жатқан қамқорлық үшін алғыс айтамын», – деді ол.
Өз кезегінде мердігер ұйым өкілдері мұндай жұмыстардың жыл сайын тұрақты түрде жүргізілетінін айтты. «Алем Шар» ЖШС маманы Фурхат Шерметов көріктендіру саласында 10 жылдан астам уақыт еңбек етіп келеді. Оның айтуынша, көктем басталысымен ұжым маусымдық жұмыстарға бірден кіріседі.
«Мен «Орталық саябақ» аумағына жауаптымын. Жыл сайын осы кезеңде сырлау және қалпына келтіру жұмыстарын бастаймыз. Барлығы тұрғындарға жайлы, таза әрі ұқыпты болуы үшін еңбек етеміз. Еңбегіміздің нәтижесін халықтың байқап, бағалауы біз үшін маңызды», – деді ол.
Аудандағы көркейту жұмыстары күн сайын жүргізіліп, алдағы уақытта да жүйелі түрде жалғасады.