Өңірлік коммуникациялар қызметінің баспасөз алаңында Ләззат Жылқыбаева аудан аумағында қолға алынған абаттандыру жұмысы жөнінде баяндады. Әкімнің айтуынша, биыл аудан аумағында тұрғындардың жайлылығы мен экологиялық теңдігін арттыруға бағытталған ауқымды жұмыс қолға алынған.
Жыл басынан бері бірнеше ірі нысан жаңартылып, көркейтілді. Сейфуллин, Назарбаев пен Абылай хан даңғылының бойындағы бос аймақтарды абаттандыру аяқталып қалды. Кемел ықшамауданында Қарасу өзені бойындағы жағалауға күрделі жөндеу жүргізіліп жатыр. Мұнда ұзындығы 1,5 шақырым болатын серуендейтін аймақ ашылады. Айнабұлақ ықшамауданында жаяу жүргіншілер Арбаты жөнделсе, Құлагерде 83 көпқабатты үйді қамтитын 28 аула жаңартылды.
Абаттандырудың маңызды бөлігі – «Халық қатысатын бюджет» бағдарламасы аясында жүзеге асқан жобалар. Тұрғындардың бастамасымен 2 миллиард теңгеге 30 жоба қолға алынды. Оның ішінде жағалаулар мен саябақтарды абаттандыру, балалар мен спорт алаңдарын орнату, серуен аймақтарын құру, көгалдандыру мен автосуару жүйелерін енгізу бар. Сонымен қатар Алматы – Өскемен жолының бойына шуды оқшаулайтын қалқандар орнатылып, батпақты аумақтар ретке келтірілді.
Қазіргі уақытта бес жаңа жобаның жобалық құжаттамасы әзірленіп жатыр. Олардың қатарында Палладин көшесіндегі 8,3 гектар аумақты қамтитын жасыл аймақты жаңғырту мен 2 гектарлық Көкмайса саябағын қайта жаңарту бар. Сондай-ақ 48 ауланы жаңарту бойынша жобалық құжат дайын – онда габиондар, жарықтандыру жүйелері, балалар мен спорт алаңдары және шағын сәулет нысандары орнатылады.
«Қолға алынған барлық шаруаның мақсаты – тұрғындарға қолайлы, заманға сай және экологиялық таза қалалық орта қалыптастыру. Әр адам өз ауданында өмір сүріп, демалып, отбасымен уақыт өткізуге жайлы жағдай жасалғанын сезінуі тиіс», – дейді аудан әкімі Ләззат Жылқыбаева.