«Халық қатысатын бюджет» бағдарламасы аясында Алматы қаласының Бостандық ауданында «Орбита 3» және «Орбита 4» шағын аудандарындағы балалар алаңдары ретке келтірілді, аулалар абаттандырылды, алты көшеде техникалық тротуар төсеу жұмыстары жүргізілді, деп хабарлайды aqshamnews.kz
Абай даңғылында бөлу жолағын абаттандыру аяқталды. Жаңғырту Байзақов көшесінен Тұрғыт Өзал көшесіне дейінгі ұзындығы 3 шақырымға жуық учаскені қамтыды. Жабындылар төселді, автоматты суару жүйесі, беседкалар орнатылды, сонымен қатар жарықтандыру толығымен жаңарды. Барлық урналар, орындықтар ауыстырылды, сондай-ақ қала тұрғындарының жайлы демалуына арналған шағын сәулет пішіндері мен әткеншектер орнатылды. Көгалдар толығымен жаңартылды, бұталар отырғызылды.
ХҚБ бағдарламасы бойынша биылғы жылға арналған негізгі бастамалардың қатарында Сайын көшесінен Кекілбайұлы көшесіне дейінгі учаскені қамтитын Торайғыров көшесін кешенді абаттандыру бар. Мұнда жаяу жүргіншілер аймағы мен велосипед жолын жөндеу, жарықтандыруды жаңарту, сондай-ақ балалар мен спорт алаңдарын жаңарту жұмыстары жоспарланған.
Бұдан басқа, аумақты көгалдандыру және суармалы су құбырын қалпына келтіру жоспарлануда, бұл қаланың осы бөлігін қала тұрғындарының белсенді демалысы үшін неғұрлым тартымды және ыңғайлы етуге мүмкіндік береді.
«Халық қатысатын бюджет» бағдарламасының маңызды бөлігі Алматының жасыл аймақтарының жағдайын едәуір жақсартатын суармалы су құбырларын салу бойынша алты жаңа жоба болмақ.
Сондай-ақ келесі мекенжайлар бойынша балалар алаңдарын жөндеу жұмыстары қарастырылған: Масанчи көшесі, 102, Абай даңғылы, 34, Көктем-1 ш-а, 1А үй және Бабаев көшесі, 35.
Аудан әкімдігінде атап өткендей, Үмбетбаев, Айманов және Солодовников көшелері де назардан тыс қалмайды. Мұнда абаттандыру элементтері бар жаңа сыртқы жарықтандыру желілері салынады, бұл тұрғындардың кешкі уақытта қозғалыс қауіпсіздігін арттырады.
Барлық нысандарды ағымдағы жылдың соңына дейін аяқтау жоспарлануда, деп атап өтті аудан әкімдігінде.
Еске салсақ, Алматыда қала әкімі Ерболат Досаевтың тапсырмасы бойынша Халық қатысатын бюджет бағдарламасының арқасында қалалық инфрақұрылымды жақсарту жобалары белсенді дамып келеді, оның көмегімен әрбір тұрғын өз ауданын қайта құруға тікелей қатыса алады, бұл қаланы жайлы әрі өмір сүруге жағымды етеді.