Бүгін Қазақ ұлттық қыздар педагогикалық университетінде Алматы қаласы Білім басқармасының қолдауымен «Сабақты зерттеу арқылы оқу мен оқытуды дамыту» (Improving Teaching and Learning Through Lesson Study) атты II қалалық ғылыми-тәжірибелік конференция өтті. Шараға 300-ден астам жетекші ғалымдар, тәжірибелі педагогтер, білім беру ұйымдарының басшылары мен болашақ мұғалімдер қатысты.
Конференция тәжірибе алмасуға, үздік практикаларды талқылауға және ғылыми зерттеулерді мектептегі күнделікті тәжірибеге енгізуге арналған алаң болды. Қатысушылар өз назарын сабақтың тиімділігін арттыруға бағытталған «Lesson Study» әдістемесіне аударды.
«Алматы қаласының орта білім беру ұйымдарында озық тәжірибемен алмасу, жетістіктерді саралау және Lesson Study әдістемесін қолдану перспективаларын анықтау бағытында жүйелі жұмыстар жүргізілуде. 2013 жылдан бастап қала мұғалімдерінің тәжірибесінде мақсатты зерттеулер жүзеге асырылып келеді. Қазіргі уақытта 32 жетекші мектеп бекітіліп, тренерлер дайындалды. Олар Lesson Study әдісі арқылы оқытуды жақсарту мәселелерін талқылауға қатысып, әріптестерімен тәжірибесін бөлісуде», – деді Алматы қаласы Білім басқармасына қарасты Қалалық білім берудегі жаңа технологиялардың ғылыми-әдістемелік орталығының (ҚББЖТҒӘО) директоры Дәурен Сағынғалиев.
Оның айтуынша, мектепті зерттеушілер қауымдастығының қоржынында 200-ден астам зерттеу жұмыстары жинақталған. Бұл нәтиже мегаполис педагогтерінің ерекше қызығушылығын тудырып отыр. ПедагогтердіңLesson Study әдісін жүргізу тәжірибесімен бөлісуі, әдістемелік ресурстар мен өзекті ақпараттарға қол жеткізуі үшін барлық жағдай жасалған.
«Білім басқармасы тарапынан қаладағы білім сапасын арттыру мақсатында жүйелі жұмыс жүргізіліп жатыр және оның оң нәтижелері де бар. Біз бұл бағыттағы жұмыстарды одан әрі күшейтіп, білім беру сапасын арттырудыжалғастырамыз», – деп атап өтті Дәурен Сағынғалиев.
Конференция жұмысы бірнеше секциялар мен постерлік галерея форматында жалғасты. Онда мұғалімдер мен студенттердің зерттеу нәтижелері мен практикалық жұмыстары ұсынылды. Ауқымды шара барысында «Мұғалім тәжірибесіндегі үздік сабақ зерттеу үлгілері», «Инклюзивті ортадағы оқыту процесін жетілдірудегі сабақты зерттеу тәжірибесі» сынды бағыттарға басымдық берілді.
Әдістемелік орталық басшысы Дәурен Наурызбайұлы атап өткендей, мұндай іс-шаралар бірлескен білім беру жобаларын іске асыруда, болашақ педагог кадрларды даярлау сапасын арттыру жолдарын іздестіруде оң рөл атқарады. Бұл бағыттағы конференциялар Алматы қаласының білім беру экожүйесін дамыту мен әріптестікті нығайтуда жаңа мүмкіндіктерге жолашады.