Жыл басынан бері Алматының Белсенді ұзақ өмір сүру орталықтарының қызметін 22 мыңнан астам зейнеткер пайдаланды, – деп хабарлайды aqshamnews.kz тілшісі.
Алматы қаласы Жұмыспен қамту және әлеуметтік бағдарламалар басқармасына қарасты «Алматы қаласының Белсенді ұзақ өмір сүру орталығы» КММ-де және аудандық Белсенді ұзақ өмір сүру орталықтарында жыл басынан бері шамамен 333 мың қызмет көрсетілді. Бұл туралы қалалық Жұмыспен қамту және әлеуметтік бағдарламалар басқармасының өкілдері айтты.
«Алматы қаласының Белсенді ұзақ өмір сүру орталығы» коммуналдық мемлекеттік мекемесі 2022 жылы құрылды. Зейнет жасындағы азаматтарға көрсетілетін әлеуметтік қызметтерге сұраныстың артуына байланысты 2024 жылдың ақпан айынан бастап қалалық орталықтың үш бөлімшесі ашылды. Оның екеуі Бостандық ауданында, біреуі Медеу ауданында орналасқан. Бұл бөлімшелерге күн сайын шамамен 500 адам келеді.
Жыл басынан бері орталыққа 13 302 зейнеткер жүгініп, оларға 48,4 мыңнан астам қызмет көрсетілді.
Сонымен қатар Алматы қаласы әкімдіктерінің жанынан мемлекеттік әлеуметтік тапсырыс аясында үкіметтік емес ұйымдар базасында жұмыс істейтін 18 аудандық Белсенді ұзақ өмір сүру орталығы қызмет көрсетеді. Жыл басынан бері бұл орталықтарға 8 834 адам жүгініп, оларға 284,7 мыңнан астам қызмет көрсетілді.
Орталықтардың негізгі мақсаты – зейнет жасындағы азаматтарды белсенді қоғамдық, мәдени, шығармашылық, спорттық және іскерлік өмірге тарту арқылы олардың физикалық және психикалық саулығын нығайтып, белсенді өмір сүру ұзақтығын арттыру.