Алматыда автосалондарға тұтынушылар құқықтарын бұзғаны үшін айыппұл салынды
Алмалы ауданының прокуратурасы автосалондардың қызметіне талдау жүргізіп, заң бұзушылықтарды анықтады, деп хабарлайды aqshamnews.kz.
Қалалық прокуратура мәліметтеріне сай, кейбір автосалондар көлік сатып алушыларға дабыл жүйесі, әйнекті қараңғылау, төсеніштер секілді қосымша қызметтерді мәжбүрлі түрде қосып, артық төлем жасауға итермелеген.
Осыған байланысты «Toyota Tsusho Kazakhstan Auto» ЖШС-на 88 млн теңгеден астам айыппұл салынды. Қазіргі уақытта бұл сома толық көлемде төленді.
Қазақстан заңнамасына сәйкес, автосалондар қосымша қызметтерді тұтынушының келісімінсіз мәжбүрлей алмайды. Егер сіз осындай жағдайға тап болсаңыз, прокуратура немесе басқа уәкілетті органдарға шағымдана аласыз.