Алматының сегіз көшесінде жасыл буферлік аймақтар пайда болады
Алмалы ауданында бірден сегіз көшеде буферлік аймақтарды ауқымды көгалдандыру жұмыстары басталды, - деп хабарлайды Aqshamnews.kz.
Буферлік аймақ – бұл жол, тротуар немесе тұрғын үйлер мен шулы нысандар арасындағы кеңістік. Жасыл желекті отырғызу шудың деңгейін төмендетіп, шаңды ұстап қалуға, ауаны тазартуға, қалалық ортаны тұрғындар үшін жайлы етуге септігін тигізеді.
Жол жиегін көгалдандыру жоспарына Наурызбай батыр, Шевченко және Құрманғазы көшелерінің жекелеген аумақтары кірді. Желтоқсан, Абылай хан даңғылы, Назарбаев және Сейфуллин сынды қалған төрт көшеде абаттандыру жұмыстары аудан аумағындағы бүкіл ұзындық бойымен жүргізіледі. Сондай-ақ, жоспарға Абай даңғылының бір бөлігі де (Назарбаев даңғылынан Есентай өзеніне дейін) енді. Барлығы 60 мыңнан астам бұта отырғызылады.
Кейбір учаскеде – Шевченко, Құрманғазы және Наурызбай батыр көшелерінде абаттандыру жұмыстары аяқталды. Тамыз айында Абай, Абылай хан даңғылы мен Желтоқсан көшесінде жұмыс басталып, 16 мыңнан астам бұта отырғызылды. Жобаны қазан айының соңына дейін аяқтау жоспарланған.
Көгалдандыру үшін көпіршік, сұр тобылғы, ақ сәнтал, көкжалбыз сынды қала жағдайына төзімді өсімдіктер таңдалды. Әсіресе, күтімді қажет етпейтін әрі алматылықтардың сүйікті гүлі Ругоза раушанына мән беріліп отыр.
Абаттандырылған учаскелерде автоматты суару жүйесі іске қосылды. Жаңа жасыл аймақтар ауданды көркейтіп, ауаны тазартып, көшелердің тыныш әрі жайлы болуына ықпал етеді.