Алатау ауданы әкімдігінде мемлекеттік органдардың өкілдері мен кәсіпкерлер қатысқан кеңес өтті. Кездесудің негізгі тақырыбы зиянды шығарындылар деңгейін төмендету және атмосфералық ауаны қорғау саласындағы жаңа талаптарды түсіндіру болды.
Алатау ауданының әкімі Данияр Қырықбаевтың айтуынша, кездесудің басты мақсаты - жаңа нормаларды талқылау және ашық диалог аясында бизнеспен бірлескен жұмысты жолға қою.
Мамандардың дерегінше, Алатау ауданында қоғамдық тамақтану орындары, моншалар мен техникалық қызмет көрсету бекеттері секілді 400-ден астам кәсіпорын жыл сайын шамамен 200 тоннаға жуық ластаушы заттарды ауаға бөледі.
Алматы қаласы Экология және қоршаған орта басқармасының басшысы Серік Әділбаев аудан аумағында 400-ден астам рейдтік іс-шара өткізілгенін, оның барысында кәуапханалар мен моншалар тексерілгенін айтты. Сондай-ақ, ол кейбір тұрғын үйлерде әлі күнге дейін жылыту үшін қатты отын мен көмір пайдаланылатынын, бұл ауаның ластануына себеп болып отырғанын еске салды.
Кездесу қатысушыларына Алматыда 2025 жылы 30 желтоқсанда бекітілген атмосфералық ауаны қорғаудың жаңа ережелері түсіндірілді. Аталған құжат қала аумағында қатты және сұйық отынды пайдалануға тыйым салады және кәсіпкерлерді арнайы сүзгі қондырғыларын орнатуға міндеттейді. Бұл талаптар 2027 жылдан бастап міндетті түрде енгізіледі. Осылайша, Алматы Қазақстанда атмосфералық ауаны қорғауда кешенді тәсіл алғаш енгізген қала атанды.
«Талаптарға сәйкес, шығарындылары төмен аймақтарда орналасқан нысандар экологиялық таза отын түріне көшуге тиіс. Атмосфераға шығарындылар көлемін азайту үшін ережелерге сай қатты отынды – көмір мен отынды, сондай-ақ сұйық отынды пайдалануға тыйым салынады. Экологиялық таза отынға, яғни газға көшу қажет. Сонымен қатар арнайы сүзгі қондырғыларын орнату талаптары бар. Айта кету керек, бұл талаптар кейінге қалдырылған кезеңді қамтиды, яғни кәсіпкерлік нысандары үшін олар 2027 жылдан бастап күшіне енеді», – деп түсіндірді «Eco Almaty» ЖШС бас директоры Мирас Гайсин.
Оның айтуынша, жаңа талаптар Экологиялық кодекс пен санитариялық-эпидемиологиялық ережелердің қолданыстағы нормаларына негізделген және қаладағы ауа сапасын кезең-кезеңімен жақсартуға бағытталған.
Кездесуге қатысушылар мемлекеттік органдар мен бизнес өкілдерінің бірлескен жұмысы ғана ауаның ластану деңгейін төмендетіп, Алматыдағы экологиялық ахуалды біртіндеп жақсартуға мүмкіндік беретінін атады.