Алматыдағы мемлекеттік табиғи ескерткіш – Баум тоғайы аумағында қаланың Урбанистика орталығының өкілдері белсенді қала тұрғындары және өзге де қоғам өкілдерімен кездесті. Басқосуда тоғай аумағын абаттандыру жобасы талқыланды.
Кездесу барысында әлеуметтік зерттеулердің нәтижелері мен алдағы қайта жаңарту тұжырымдамасы ұсынылды. Қатысушылар пікір алмасып, жоба аясында тоғайдың табиғи экожүйесін сақтау маңызды екенін атап өтті.
Жобаның негізгі элементтері табиғи тепе-теңдікті сақтауға бағытталған экологиялық аймақтарға бөлу, жасыл желекті сақтау және қалпына келтіру, апатты жағдайдағы ағаштардан кезең-кезеңімен тазарту, аурулар мен зиянкестерге қарсы күрес, жаңа көшеттер отырғызу жұмыстарын қамтиды. Сондай-ақ, экожүйені қалпына келтіруге ерекше назар аударылып отыр: арық жүйесін жаңарту, жабайы жануарлардың тіршілік ету ортасын қорғау, тоғайды Басқарасу өзенімен байланыстыруды жақсарту жоспарланған.
Бұған қоса, қауіпсіздікті қамтамасыз ету шаралары қарастырылған: жарықтандыру жүйесін орнату, патруль қызметін ұйымдастыру және автокөлік кіруін бақылау. Рекреациялық инфрақұрылымды дамыту аясында табиғи ортаға барынша аз зиян келтіре отырып, экологиялық соқпақтар, тыныш демалыс аймақтары, балалар және спорт алаңдарын салу көзделіп отыр. Жобада ағартушылық бағыт та маңызды: визит-орталық, ақпараттық тақталар, оқушыларға биология сабақтарын өткізу және экологиялық сананы қалыптастыруға қолдау көрсету жоспарланған.
Жобаны іске асыру барысында тұрғындар мен сарапшылардың пікірі ескерілетіні атап өтілді. Алдағы уақытта тоғай аумағында мамандардың қатысуымен ашық талқылаулар мен баспасөз туры ұйымдастырылады.