Алматыда экологиялық жағдайды жақсарту және қаланы көгалдандыру мақсатында республикалық «Таза Қазақстан» бағдарламасы мен «Алматы – біздің ортақ үйіміз» қалалық науқаны аясында «Жарқын күз» атты күзгі акция өтіп жатыр, деп хабарлайды aqshamnews.kz
Бұл акция экологиялық жағдайды жақсартуға және қаланы көгалдандыруға бағытталған. «Жарқын күз» акциясы қала тұрғындарына көшелерді тазалап, 10 мыңнан астам ағаш пен бұта көшеттерін отырғызуға мүмкіндік берді.
Таңертеңнен бастап алматылықтар белсенді түрде көшеттер отырғызып, үйлерінің маңында, көше бойында және қаланың саябақтарында жаңа жасыл аймақтар құруға атсалысты. Бүгінгі экологиялық акцияға 10 мыңнан астам қала тұрғыны қатысып, 300-ден астам техника мен 1755 коммуналдық қызметкер жұмылдырылды.
Ауқымды тазалық жұмыстары барысында рекреациялық аймақтар, саябақтар, скверлер және аула аумақтары тазартылып, шамамен 4 мың текше метр қоқыс жиналды. Жиналған қоқыс қала әкімдігінің күшімен полигондарға шығарылды.
Іс-шараның негізгі жетістігі – 10 мыңнан астам ағаш отырғызу. Отырғызылған ағаштар арасында алма ағашы, қарағаш, акация, үйеңкі, шегіршін секілді түрлер бар. Бұл ағаштар ALA паркіне, Гагарин даңғылы бойындағы бульварға, Алатау ауданына, Желтоқсан саябағына, Көкжиек шағын ауданына және басқа да орындарға отырғызылды.
Акция өткен учаскелерде мәдени-ойын-сауық бағдарламалары да ұйымдастырылды.