Қала тұрғындары мен қонақтары ұйымдастырушылар дайындаған сан алуан іс-шаралар мен акцияларға белсенді қатысуда,деп хабарлайды aqshamnews.kz
Мысалы, «Астана» алаңы маңында ұлттық спорт түрлерінен жарыстар өтіп жатыр. Турнирге қаланың 8 ауданынан келген командалар қатысты. Арқан тарту сайысында Медеу ауданының құрама командасы Жетісу ауданының спортшыларын жеңіп шықты. Сонымен қатар, ашық аспан астындағы сахнада қазақстандық эстрада жұлдыздары өнер көрсетіп, қала тұрғындары мен қонақтарын Наурыз мейрамымен құттықтады.
Панфилов көшесіндегі шара қонақтардың назарын көше сиқыршыларына аударды. Олар ерекше трюктер көрсетіп, әсіресе балалардың қызығушылығын оятты. 
Сондай-ақ, әйгілі комикстерден алынған трансформер-роботтар бейнесіндегі мүсіндер де көрерменді таңғалдырды. Көпшілік олармен суретке түсті. 
Мерекенің басты сәніне айналған көрмелердің бірі – белгілі фотограф Оңғарбек Алхаровтың туындылары. Ол қазақтың ұлттық киімдерін киген адамдарды бейнелейтін ерекше фотосериясын ұсынды.
“Осы арқылы мен халқымыздың рухани байлығын және мәдени мұрасын жеткізуге тырысамын. Көшпенділердің бай дәстүрі мен мәдениетін суреттерім арқылы әңгімелеп беремін. Наурыз – менің ең сүйікті мерекем. Ол табиғаттың жаңаруын, жаңа өмірдің басталуын білдіреді және болашаққа деген сенімді күшейтеді. Осы уақытта қаланың орталығы мерекелік көңіл-күйге тола түсті. Алматылықтар отбасыларымен келіп, түрлі іс-шараларға белсенді қатысады. Сөйтіп Наурыз мейрамының шаттыққа толы атмосферасын сезінеді”, - дейді Оңғарбек Алхаров.