Алматылық жеңіл атлеттер жастар арасындағы Азия чемпионатында үш медаль жеңіп алды, – деп хабарлайды aqshamnews.kz тілшісі.
28–31 мамыр аралығында Гонконгте 20 жасқа дейінгі спортшылар арасында жеңіл атлетикадан Азия чемпионаты өтті. Бұл туралы Алматы қаласының Спорт басқармасы өкілдері айтты.
Айтулы додаға 29 елден 500-ден астам спортшы қатысты. Чемпионат қорытындысы бойынша Алматы спортшылары Қазақстан құрамасы сапында үш медаль жеңіп алды.
Сырықпен секіруден Анна Черкашина күміс жүлдегер атанды. Ал Маргарита Косинова ел қоржынына тағы екі медаль салды. Ол 4×400 метрлік эстафеталық жарыста Қазақстан құрамасы сапында күміс медаль жеңіп алып, 400 метр қашықтықта қола жүлдеге ие болды.
Спорт басқармасы өкілдерінің мәліметінше, алматылық спортшылардың табысты өнер көрсетуі жүйелі дайындық пен жаттықтырушылар құрамының кәсіби жұмысының нәтижесі болды.