Алматыда 6 жастан 18 жасқа дейінгі шахматшы жастар арасында классикалық, рапид және блиц шахмат бойынша Қазақстан чемпионаты өз мәресіне жетті. Турнирге Қазақстанның 17 өңірі мен 3 қаласынан 950 жас шахматшы қатысты, деп хабарлайды aqshamnews.kz
Астана қаласының өрендері үздік атанып, 17 алтын медаль жеңіп алды. Оның ішінде классикадан – 6, рапидтен – 5, блицтен – 6 алтын. Сонымен қатар, Алматы, Алматы облысы, Ақтөбе, Түркістан және Павлодар облыстарының шахматшылары да жүлделі орындардан көрінді.
Алматылық шахматшылар ерекше нәтижеге қол жеткізді. 6 жасқа дейінгі жас санатында Макар Чернышов және 12 жасқа дейінгі жас санатында Данис Қуандықұлы шахматтың барлық үш түрі бойынша алтын медаль жеңіп, "абсолютті чемпион" атанды. Бұл жетістікке Алматы облысының шахматшылары Жансая Шолпанбек пен Елназ Қалиахмет те қол жеткізді.
Классикалық шахматтан чемпион атанған жасөспірімдер Грузияның Батуми қаласында өтетін әлем кубогында, сондай-ақ жас ерекшеліктеріне қарай әлем чемпионаттарында Қазақстанның намысын қорғайды. Екінші орын иегерлері Тайландта өтетін Азия чемпионатына қатысады. Ал жүлделі орындарға ие болған басқа шахматшылар оқушылар арасындағы әлем және Азия чемпионаттарына, сондай-ақ Батыс Азия чемпионатына жолдама алды.
Бұл чемпионат Қазақстанда шахматтың қарқынды дамып келе жатқанын және жас таланттардың халықаралық аренада лайықты өнер көрсетуге дайын екенін көрсетті.