Алматыда жергілікті қазақ отбасы америкалық әнші, актриса Дженнифер Лопестің бас гитарисін үйіне қонақ етіп, ұлттық тағамнан дәм таттырды, - деп хабарлайды Аqshamnews.kz.
Бота есімді қала тұрғынының айтуынша, оған інісі 15 минут бұрын телефон шалып, үйіне қонақпен келе жатқанын айтқан. Қонақтың кім екенін сұрағанда, ол Джей Лоның бас гитарисі екенін жеткізген.
"Жағдай былай болды. Джей Лоның командасы біздің үйіміздің маңындағы отельде тұрақтаған. Ал інім сол маңайда баскетбол ойнап жүрген. Джей Лоның гитарисімен сол жерде танысып, оны қонаққа шақырған. Ол келіскен. Інім бізге қоңырау шалып, дастархан жая беруді ескертті. Үйде бесбармақ дайындалып жатқан еді. Ол ұлттық тағамнан дәм татып, үйдегі гитарада ойнап беріп, жылы лебізін білдіріп кетті", - деп жазды Бота желідегі парақшасында.
Бота қонаққа дәстүрге сай сарқыт та салып беріп жіберген. Гитаристің қарапайымдылығы көптің көңілінен шығып, түрлі пікірге ұласты.
Айта кетейік, 10 тамыз күні Алматыда Орталық стадионда америкалық жұлдыз Джейлоның концерті өтті. Шараға 20 мыңнан астам көрермен жиналды.