Іле-Алатау ұлттық табиғи паркінің Аюсай шатқалында Наурызбай ауданының мектеп оқушылары мен педагогтарының қатысуымен ауқымды экологиялық сенбілік өтті, деп хабарлайды aqshamnews.kz
Іс-шара «Тaza Қазақстан» және «Парктер шеруі – 2025» экологиялық акциялары аясында ұйымдастырылды. Шараны ұйымдастырушы — Алматы қаласы Білім басқармасы.
Мектеп оқушылары мен олардың мұғалімдері 3 гектар аумақты тазалап, 2,5 тонна қоқыс жинады. Сенбілікке қатысушылардың бірі — 8 «А» сынып оқушысы Қалдыбек Мирас пен экоұйым жетекшісі Жақыпақын Шынар Нұрдәулетқызының айтуынша, бұл экологиялық акция табиғатқа тұтынушылық көзқарасқа қарсы шығып, қоршаған ортаны қорғауға және Алматыда экологиялық туризмді дамытуға бейжай қарамайтын жандарды біріктірді.
Наурызбай аудандық білім бөлімінің басшысы Салтанат Құсайынованың айтуынша, Аюсай шатқалы — қаланың шекарасында орналасқанымен, табиғат аясында тынығуға мүмкіндік беретін бірегей орын. Алматы тұрғындары мен оңтүстік астананың қонақтары бұл жерге отбасыларымен келіп, жаяу жүргіншілерге арналған соқпақ жолдармен серуендеп, таза ауамен тыныстауға келеді.
«Балаларымыз ерекше әсер алды. Олар мегаполисті қоршаған табиғаттың сұлулығын бала кезден сезініп қана қоймай, соны сақтап, биологиялық әртүрлілікті қорғау қажеттігін де түсінгені маңызды. Бүгін экологиялық мәдениетті қалыптастыра отырып, біз ертеңгі жауапты ұрпақты тәрбиелейміз», деп атап өтті Салтанат Құсайынова.
Наурызбай ауданының мектеп оқушыларына қоршаған ортаға ұқыпты қарау және таудағы қауіпсіздік туралы тақырыптарда дәрістер оқылды. Бұл экологиялық сенбілік олардың өміріндегі жарқын естеліктердің біріне айналып, ұзақ уақыт жадыда қалары сөзсіз.