Алматы қаласында 2025 жылғы наурыз айының 23-28 аралығында жаратылыстану-математика бағытындағы пәндер бойынша республикалық олимпиаданың география және математика пәндерінен қорытынды кезеңі өтті.
Оңтүстік астанамызда ұйымдастырылған білім сайысында еліміздің ең үздік 325 оқушысы өз білімдерін дәлелдеді.
Олимпиада барысында қатысушылар екі кезеңнен тұратын тапсырмаларды орындап, өзара сынға түсті:
1-турда – теориялық тапсырмалар шешілді;
2-турда – география пәнінен далалық тур, ал математикадан күрделі теориялық есептер қарастырылды.
Олимпиада бағдарламасы аясында қатысушыларға «Көк төбе» саябағы мен ҚР Мемлекеттік музейіне экскурсиялар, психологиялық тренингтер, спартакиада ұйымдастырылды. Ал команда жетекшілері үшін оқу-әдістемелік семинарлар және Алматы қаласының жетекші мектептеріне экскурсия өткізілді.
Республикалық кезеңде Алматы қаласының намысын география пәнінен 7, математика пәнінен 14 оқушы қорғады.
Олимпиаданың қорытындысы бойынша Алматы қаласының құрамасынан 18 оқушы ҚР Оқу-ағарту министрлігінің І, ІІ, ІІІ дәрежелі дипломдарымен, алтын, күміс, қола медальдальдарымен және бағалы сыйлықтармен марапатталды.
Айрықша жетістіктері үшін ҚР Оқу-ағарту министрлігі «Дарын» Республикалық ғылыми-практикалық орталығының грамоталарымен 2 оқушы марапаттады.
Жаратылыстану-математика бағыты бойынша жалпыкомандалық есепте Алматы құрамасы бірінші орынды иеленіп, «Ең үздік олимпиадалық команда – 2025» атағын жеңіп алды.
Айта кетейік, Алматы қаласы 23 жыл қатарынан үздік олимпиадалық команда атағын сақтап келеді. Бұл жетістік – оқушылар мен ұстаздардың қажырлы еңбегінің нәтижесі.
Білім шыңын бағындырып, жеңіс тұғырынан көрінген оқушыларымызды шын жүректен құттықтаймыз! Халықаралық аренада да жаңа белестерді бағындыруды тілейміз!