Алматылық оқушылар халықаралық «San-Remo Best Song» байқауында жүлделі орындарға ие болды
Алматылық жас өнерпаздар Дубайда өткен халықаралық "San-Remo Best Song" музыкалық байқауында үлкен жетістікке жетіп, жүлделі орындарға ие болды, деп хабарлайды aqshamnews.kz Almaty.tv тілшісіне сілтеме жасап.
Байқаудың басты ерекшелігі – қатысушылардың Парсы шығанағын аралап, лайнер үстінде өнер көрсетуі. Осы бірегей форматта өткен жобаға 10-ға жуық елдің талантты жастары қатысты. Айта кетейік, бұл конкурс осымен екінші рет ұйымдастырылса да, Қазақстан алғаш рет қатысып отыр.
Төрешілердің ерекше ықыласына бөленген жас өнерпазымыз Милана Абдукаимова биыл маусым айында Италияда өтетін беделді "Сан Ремо Джуниор" байқауына жолдама алды.
"Гран-при алған жүлдегерлердің бірі – менің қызым Милана. Ол тек "Сан Ремо Джуниор" байқауына ғана емес, сонымен қатар Юрмала жобасына да жолдама алды. Бұл оның таланты мен қажырлы еңбегінің нәтижесі. Біз өте қуаныштымыз және Милананы жетелеп, қолдау білдірген ұстаздарына алғысымыз шексіз", – дейді Милананың анасы Санан Машаева.
Бұл жеңіс алматылық оқушылардың халықаралық деңгейдегі шығармашылық қабілетін көрсетіп, Қазақстанның өнерін жаңа белеске көтеруге мүмкіндік береді.