Бүгін "Желтоқсан Алматы" қоғамдық бірлестігінің мүшелері Саяси қуғын-сүргін және ашаршылық құрбандары күніне құрмет ретінде ұлт ұстазы – Ахмет Байтұрсынұлының ескерткішіне тағзым етіп, гүл шоқтарын қойды.
Одан соң Алматы іргесінен орын тепкен Талғар қаласында (Алматы облысы) орнатылған "Батырлар аллеясына" да арнайы барып, алқызыл гүлдер толы себет қойды.
– Біз қазақтың бетке ұстар қаймақтарының көзін жоюға ұмтылған сонау Кеңестік жүйенің қитұрқы саясатын, қолдан ұйымдастырылған ашаршылық нәубетті қалай ұмытамыз?! Одан бергіде орын алған Желтоқсан оқиғасы да бір кездері саяси басқыншылыққа қарсы тұрған Алаш қайраткерлерінің ізін жалғаған, Тәуелсіздікті армандаған жастардың жанайқайы болатын. Біздің қоғамдық бірлестіктің 700-ден астамы мүшесі, Алматының барлық сегіз ауданында жетекшілері бар. Биыл да жылдағы дәстүрімізден жаңылмай, саяси қуғын-сүргін құрбандарына ас беріп, Құран бағыштадық, – дейді "Желтоқсан Алматы" қоғамдық бірлестігінің төрағасы Серікбек ЖАНДЫБАЙ.
