Жедел жәрдем бригадасы Алматы қалалық Жедел шұғыл көмек көрсету ауруханасының қабылдау бөліміне ауыр жағдайда 43 жастағы әйелді жеткізді.
Қабылдау бөлімінде науқасты көпбейінді топ қарады.
Ауруханаға түскен кезде әйелдің жатыры 13-14 апталық жүктілікке сәйкес ұлғайғаны анықталған (11-12 апталық жүктілікке сәйкес ұлғаю – үлкен ісік болып саналады). Қан кетіп, ауыр анемияға ұшыраған (гемоглобин – 22 г/л), науқастың жалпы жағдайы ауыр болған. Пациент дереу анестезиология, реанимация және қарқынды терапия бөлімшесіне жатқызылған. Негізі науқасқа 2022 жылы «жатыр миомасы» диагнозы қойылған екен.
– Пациентте гемоглобин деңгейі 22 г/л, яғни өте төмен болды. Жатыр миомасы бар науқастарда гемоглобин деңгейінің түсуінің негізгі және айқын себебі – зақымдалған органнан патологиялық қан кету. Сондықтан миомамен ауыратын науқастарда патогенетикалық теміртапшылығы бар анемияның емі – қан кету көзін, яғни жатырды хирургиялық жолмен алып тастау, – деп түсіндіреді аталған аурухананың гинекология бөлімшесінің меңгерушісі Алма Бексұлтанова.
Осылайша А.Бексұлтанова және дәрігер-гинеколог Б.Қалдыбай Пфанненштиль бойынша лапаротомия, сол жақ қосалқыларымен жатырдың экстирпациясы отасын жасады. Операция 2 сағатқа созылды.
Отадан кейінгі кезең асқынусыз өтті. Әйел өзін жақсы сезініп, ауруханадан үйіне шығарылды.
– Біздің тәжірибемізде үлкен көлемдегі миома жиі кездеседі. Мұндай түзілімдер бүйректің қалыпты жұмысына кедергі келтіруі, жұқпалы және қабыну ауруларының дамуына ықпал етуі мүмкін. Асқорыту жүйесінің жұмысы да бұзылуы мүмкін. Сонымен қатар, олар онкологиялық қауіп төндіреді. Барлық әйелге патология мен ауру болмағанның өзінде кем дегенде жылына бір рет гинеколог маманға көріну керек екенін еске салғым келеді. Қайталап айтамын, гинекологқа үнемі қаралып, уақытында тексеруден өту маңызды. Өйткені әйел адам шыдамды келеді, көп ауру туралы білмеуі және ешқандай белгіні сезбеуі де мүмкін. Ал егер сізде қандай да бір гинекологиялық ауру болса, онда міндетті түрде дәрігер ұсынған жүйелілікпен тексеріліп тұру керек. Ал егер маман ота жасауды талап етсе, созбай уақытында жасатуға мән берген жөн, – дейді Алма Бексұлтанова.