Алматыда орналасқан Қазақстан Республикасы Мемлекеттік Орталық музейінде жеткіншектердің игілігі үшін бірнеше үйірме жұмыс істейді.
Шығармашылыққа жақын балалар үйірмелерге әрқашан қуана да асыға келеді дейді музей мамандары.
Аталмыш музейдің педагогтары жуырда «ШеберKIDS» қолөнер үйірмесі (жетекшісі Айжан Құрбанова) шеңберінде кіші және үлкен топтарға арналған шеберлік сабақтарын өткізді. «Қазақтың ұлтық ою-өрнектері» тақырыбында балалар киізден ою-өрнек («қошқар мүйіз», «түйе ізі», «құс қанаты») кестеленген сәндік төсеніштер жасады.
Ал «Алматы – ортақ үйіміз» акциясы аясында «Шығармашылықтың баспалдақтары» инклюзивті үйірмесінде (жетекшісі Зухра Баянова) өрендерге арналған «Қызғалдақтар қуаныш сыйлайды» тақырыбында инклюзивті сабақ өткізілді.
Сабаққа «Биік белеске бағыт» қоғамдық қоры және «Шыңға өрлеу» әлеуметтік клубының балалары шақырылды. Үйірменің ұйытқысы болған үлкендер кішкентай достарға Алматының көрікті жерлері туралы ақпарат берді және табиғатты сүю, оны аялай білу керектігін түсіндірді. Алматыда өсетін қызғалдақтар туралы мәліметтер айтылып, балалар түрлі-түсті қағаздан «Қызғалдақ» аппликациясын жасады.