Қар кешкі сағат 20:00-ден бастап жауа бастады. Қар қалыңдығы қалада шамамен 1 см, таулы аймақта 10 см-ге дейін.
Синоптиктер қардың жауатынын күні бұрын болжап, қаланың коммуналдық қызметі тазалық жұмыстарына күні бұрын құрал-саймандарын сайлап қойды. Қала тұрғындарына күннің күрт суытатыны, қарды уақытылы күреу үшін жүргізушілерден көлікті жол жиегіне қоймау ескертілді.
Қар түспей тұрып, 204 құм-тұз шашқыш техника магистральдарды алдын ала сұйық реагенттермен өңдеді. Көктайғаққа қарсы материал себіліп, аялдамалар, жаяу өткелдер мен көпірлер тазартылып жатыр.
Шәкіртжан Қуатжан "Алматы Тазалық" мемлекеттік коммуналдық кәсіпорнында 4 жылдан бері еңбек етеді. Аялдамалар мен жаяу жүргіншілер жолын тазалау – оның күнделікті жұмысы. Түнімен тоқтамайтын коммуналдық қызмет жұмысының бәрі халықтың игілігі үшін дейді ол.
"Таңғы 8-ден бері қар тазалығын жасап жатырмыз. Бәрі халықтың қамы үшін. Жұмысым өзіме ұнайды", - дейді жұмысшы.
Қала көшелерінде 918 арнайы техника және 2550 жол жұмысшысы қызмет атқаруда. Толассыз жауған қарды арнайы техника жол жиектерінен барынша жылдам тазалап әкетіп жатыр. Жол жұмысшыларының жасап жатқан жұмыстарының бәрі көлік иелері мен жаяу жүргіншілердің жайлылығы үшін.
Суретте көлікпен қаланы тазартып жүрген жұмысшы Нұрсұлтан Қалық
Негізгі магистральдер, көпірлер, жол айрықтары, еңістер мен көтерілістер, тротуарлар және аялдама аймақтары көктайғаққа қарсы материалдармен өңделіп жатыр. Жұмыстар тәулік бойы жүргізіліп жатыр.