Жетісу ауданында жол инфрақұрылымын дамыту жұмысы жүйелі түрде жалғасып, үлкен ауқымға ие болды. Өңірлік коммуникациялар қызметіндегі брифингте аудан әкімі Ләззат Жылқыбаева осы жол жөндеу мен жол инфрақұрылымын одан әрі дамыту жоспары туралы баяндап берді, – деп хабарлайды aqshamnews.kz тілшісі.
2026 жылы 52 көшеде жалпы ұзындығы 42 шақырым болатын жолға орташа жөндеу жүргізіліп, тротуар салынады. Тамыз айының соңына дейін 31 мың шаршы метр жол жабынын жөндеп, 5 мың метр техникалық тротуар салады.
Қауіпсіздік мәселесіне ерекше назар аударылды. Аудандағы біраз көше мен Кемел ықшамауданында көшкін қаупі бар жерлерді қазір нығайтып жатыр.
«Тұрғындардың қауіпсіздігін қамтамасыз ету — біздің жұмысымыздың басты қағидаты. Біз қауіпті азайтып, қалалық инфрақұрылымның тұрақтылығын арттыруға бағытталған жобаларды кезең-кезеңімен жүзеге асырып жатырмыз», — деп атап өтті аудан әкімі.