Жетісу ауданында инфрақұрылымды жаңғырту аясында инженерлік желілерді салу мен қайта жаңарту бағытында ауқымды жұмыс қолға алынып жатыр. Бұл туралы аудан әкімі Ләззат Жылқыбаева Өңірлік коммуникациялар қызметінде өткен брифинг барысында мәлімдеді, – деп хабарлайды aqshamnews.kz тілшісі.
Жыл аяғына дейін 64 көшеде жалпы ұзындығы 67,8 шақырым болатын инженерлік желі салынады. Бұл шамамен 3,7 мың абонентті қамтиды. Сонымен қатар 7,8 шақырым су құбыры мен 1,1 шақырым кәріз желісін қайта жаңарту, сондай-ақ жылу желілерін де қоса жаңғырту көзделіп отыр.
Электрмен жабдықтау мәселесіне де ерекше назар аударылды. 29,3 шақырым электр желісін қайта жаңарту жоспарланған.
Сыртқы жарықтандыру жүйесін де дамыту жағы қолға алынды. Биыл 35 шақырым кабель желісі ауыстырылып, 107 жаңа тірек орнатылып, 3 мыңнан астам шамды ауыстырып, жаңартқалы отыр.
«Инженерлік инфрақұрылымды кешенді жаңғырту — жайлы қалалық ортаның негізі. Біздің мақсатымыз - тұрғындарды сапалы әрі сенімді қызметпен қамтамасыз ету», — деп аяқтады өз сөзін аудан әкімі.