Алматыдағы түзеу мекемесінің жасөспірімдері танымдық кеште белсенділік тантты, – деп хабарлайды aqshamnews.kz тілшісі.
Алматы қаласы Қылмыстық-атқару жүйесі департаментіне қарасты №11 мекемеде кәмелетке толмаған жазасын өтеуші жасөспірімдер үшін жыр дүлдүлі Жамбыл Жабаевтың 180 жылдық мерекесіне арналған әдеби-танымдық кеш өтті.
Іс-шараға Жамбыл атындағы мемлекеттік жасөспірімдер кітапханасының қызметкерлері Айбын Ахмадиев пен Санжар Сейсембаев мұрындық болды.
«Әдеби-кештің мақсаты – ақынның өлеңдерін насихаттап, жастарды адамгершілікке тәрбиелеу, ұлтжанды, кішіпейіл болуға шақыру. Бізді түзеу мекемесінде жазасын өтеп жатқан жасөспірімдердің келер күндерден үміт үзбей, кітап оқып, жақсылыққа, түзелуге ұмтылып жүргені қуантады. Олар Жамбыл бабамыздың өлеңдерін мәнерлеп жатқа айтты. Сол арқылы олардың шығармашылық қабілетінінің дамып келе жатқаны байқалады. Біз ұйымдастырған викториналық сауалдарға да қызығушылық танытып, белсене қатысты», – дейді Айбын Ахмадиев.
Кеш барысында жастар «Жыр алыбы – Жамбыл» деген тақырыпқа топтастырылған кітап көрмесін тамашалады. Белсенділік танытқан балаларға «Мақтау қағазы» табысталды.