500 саудагерге Жетісу ауданындағы сауда орнында жұмысын жалғастыруды ұсынды
Алматыдағы «Тұлпар» базарында 1 сәуірден бастап жөндеу жұмысы басталады, деп хабарлайды Almaty-akshamy.kz Almaty.tv-ге сілтеме жасап.
Ал ондағы 500 саудагерге әкімдік қызметкерлері Жетісу ауданындағы сауда орнында жұмысын жалғастыруды ұсынды. Кәсіпкерлік және инвестициялар басқармасының мамандары уақытша орынды жалға алу құнына да жеңілдік қарастырылғанын айтты. Айта кетейік, базар иесіне 2019 жылдан бері күделі жөндеу жүргізу керегі айтылған. Себеп – мұнда саудагерлер мен тұтынушыларға еш жағдай жасалмаған. Cауда орны 25 жыл бұрын жұмысын бастаған. Алмалы ауданында орналасқан базар тұрмыстық заттар мен автокөлік бөлшектерін сатумен айналысады.
«Модернизация уақыты бір жарым жылдай жүргізіледі. Қазіргі базарда істеп жатқан кәсіпкерлер жөндеуден кейін сауда орнында жұмыс істей алады. Ол бойынша жеке кәсіпкер мен саудагерлер меморандум жасап, өзара келісті», – деді Кәсіпкерлік және инвестициялар басқармасы басшысының орынбасары Қайрат Нұрқасымов.