Жаңа ұрпақ интервенциялық кардиологиясы: Алматы ҚКО TAVI тәжірибесін бөлісті
Алматы Қалалық кардиологиялық орталығында аорталық қақпақшаны транскатетерлік жолмен ауыстыру (TAVI) бойынша мастер-класс өтті, деп хабарлайды aqshamnews.kz
Швециядан келген белгілі маман, Каролинска университетінің профессоры Наузад Салех өз тәжірибесін бөлісті.
Оқыту барысында үш TAVI отасы сәтті орындалды. Бұл тәжірибе дәрігерлерге озық технологияны қолдану арқылы заманауи әдістің қыр-сырын меңгеруге және халықаралық стандарттарға сай машығын шыңдауға мүмкіндік берді.
TAVI (Transcatheter Aortic Valve Implantation) - қолқа қақпақшасын дәстүрлі ашық әдіспен алмастыруға балама ретінде ұсынылатын шағын инвазивті процедура.
Бұл әдіс ауыр аорталық стенозы бар, дәстүрлі ота жасауға қарсы көрсетілімі бар науқастарға, әсіресе жасы үлкен немесе қатар жүретін аурулары бар адамдарға ұсынылады.
TAVI-дің басты артықшылығының бірі - оңалту кезеңінің қысқа болуы және отадан кейінгі асқыну қаупінің төмендігі.
Қалалық кардиологиялық орталық директорының орынбасары Амина Ракишеваның айтуынша, бұл ота ең алдымен жүрек-қан тамырлары ауруымен ұзақ ауыратын науқастар үшін маңызды. «Бұл - жылдар бойы сырқатпен күресіп, бірнеше рет ем қабылдаған, ауруханаға түскен, бірақ үнемі күткен нәтижеге қол жеткізе алмаған пациенттер. TAVI әдісі әсіресе 70 жастан асқан жандарға тиімді, себебі оларға қауіпсіз әрі жұмсақ ем алу мүмкіндігін береді», - дейді ол.
Бұл профессор Салехтің Алматы Қалалық кардиологиялық орталығында өткізген TAVI бойынша екінші мастер-класы. Алғашқысы 2024 жылдың желтоқсанында өтіп, оның барысында төрт ота жасалған болатын.
Сол кезде орталық директоры Роза Қуанышбекова араласудан кейінгі алғашқы күндердің өзінде пациенттердің жағдайы едәуір жақсарғанын атап өткен.
«Мұндай шара Қалалық кардиоорталықтың халықаралық интервенциялық кардиология кеңістігіндегі беделін арттырып, жоғары технологиялық медициналық көмекті заманауи стандарттарға сай дамытуға жол ашады», – деп түйіндеді Амина Ракишева.