Биыл Желтоқсан қаһарманы Ербол Сыпатаевтың туғанына 60 жыл толып отыр.
Желтоқсан қаһармандарының азаматтық ерлігін насихаттау және жастардың бойында ұлтжандылықты нығайту мақсатында «Патриоттық рух - басты құндылық» атты іс-шаралар кешені жүзеге асырылуда. Олардың қатарында мегаполистегі Е.Сыпатаев атындағы көшенің тазалағын сақтау мақсатында сенбілік өткізу, қазақ күресінен турнир, мектеп оқушылары арасында эссе жазудан конкурс, конференция өткізу, жастар арасында тақырыптық кездесулер ұйымдастыру қарастырылған.
Желтоқсан ардагерлері мен жастардың қатысуымен Е.Сыпатаев атындағы көшеде сенбілік өтті. Оған 50-ге жуық адам қатысты.
"Бүгін халықаралық "Жанашыр" қоғамдық қоры ұйымдастырған іс-шараға қолдау білдіріп келіп отырмыз. Желтоқсан оқиғасының жаңғырығы жастар санасында біздің үлгілі істерімізбен сақталуы тиіс. Желтоқсан батыры Ерболдың әруағын сыйлап, атына берілген көшеде сенбілік өткізіп, жастарға үлгі көрсетіп жатырмыз. Мақсатымыз - жастар елін, жерін сүйіп, Отанды қорғап, тазалығын сақтауды өздеріне парыз санаса дейміз," - дейді "Желтоқсан ақиқаты" республикалық қоғамдық бірлестігінің төрағасы Болат Құрымбаев.
Осылайша Желтоқсан ардагерлері «Таза Қазақстан» республикалық акциясына үлес қосып, қаланың тазалығын арттырды.
Іс-шараны Алматы қаласы Қоғамдық даму басқармасының қолдауымен Халықаралық «Жанашыр» қоғамдық қоры ұйымдастырды.