Алматының жүрегінде орналасқан Сайран көлінің жағасында ерекше экологиялық шара өтіп жатыр. Табиғатты аялауға үндейтін бұл тазалық акциясына еліміздің танымал тұлғалары - әншілер, актерлер мен жазушылар белсене ат салысып жатыр, деп хабарлайды Aqshamnews.kz тілшісі
Тазалық акциясына эстрада жұлдыздары Жұбаныш Жексенұлы, Диана Исмаил, Тахмина Әшімбекова, Қазыбек Әдікей мен Димаш Дәулетов қатысып, табиғатты таза ұстауға шақырды. Сонымен қатар, сахна саңлақтары Ұлан Нүсіпәлі, Лиза Серікова, Камалия Байтлеуова, Бақыт Тушаев пен Әсет Иманғали да қолдарына қап алып, көл жағасын қоқыстан тазартуға үлес қосты.
Акцияға әдебиет майталмандары - Қазақстанның халық жазушысы Ұлықбек Есдәулет, публицист Бигелді Ғабдуллин, ақын, жазушы Мұратхан Шоқан мен жазушы Нұрдәулет Ақыш та қатысты. Олар табиғатты қорғаудың маңыздылығын айтып, жастарды осындай игі істерге жиі қатысуға үндеді.
Әнші Жұбаныш Жексенұлы:
"Сайран – біздің ортақ игілігіміз. Қаланы таза ұстау – әрқайсымыздың парызымыз. Қала жалғыз, біз көппіз. Егер әр адам жауапкершілікпен қараса, табиғатты бүлдірмейміз", – деп пікір білдірді.
Жазушы Ұлықбек Есдәулет те өз ойын бөлісті:
"Сайран – Алматының сәні, көркі. Оның табиғи келбетін сақтау – бізге аманат. Бұл көлді сақтау – болашаққа мұра қалдыру деген сөз", – деді ол.
Шара соңында қатысушылар таза жағалауда естелік суретке түсіп, экологияны сақтаудың маңыздылығы жайлы ойларымен бөлісті.