Алматы қаласының әкімдігі «Сайран» автовокзалының меншік иесімен оны коммуналдық меншікке қайтару мәселесі бойынша келіссөздер жүргізуде. Бұл туралы Алматы әкімі Ерболат Досаев Орталық коммуникациялар қызметінде өткен брифинг барысында хабарлады.
Журналистердің автовокзал аумағын ауқымды жаңғырту және абаттандыру бойынша жоспарларға қатысты қойған сұрағына жауап бере отырып, қала басшысы «Сайран» 2000-жылдардың ортасында жекеменшікке өткенін, ал 2018-2019 жылдары нысанның меншік иесі ғимаратқа базалық жаңғырту жүргізгенін еске салды.
«Автовокзал біз үшін ішкі көлік торабындағы маңызды нысан. Алматының Бас жоспары мен егжей-тегжейлі жоспарлау жобасына сәйкес, автовокзал қоғамдық іскерлік аймақта, нақтырақ айтқанда көлік қызметін көрсететін объектілер аймағында орналасқан. Сондықтан ол жолаушыларды көліктен көлікке ауыстыру үшін өте қолайлы», - деді Ерболат Досаев.
Сонымен қатар, Алматы әкімі автовокзалдың меншік иесімен нысанды коммуналдық меншікке қайтарып, оны жаңғырту және бірыңғай кешен құру бойынша келіссөздердің басталғанын атап өтті.