Шаһарымызда «Жанұя» мамандандырылған кешені жетім балаларға қолдау көрсетіп, қамқорлық жасап келеді. Ал, жақын арада жаңа, заманауи ғимаратқа көшетін болады. «BI Group» құрылыс компаниясы бизнестің өз қаржысы үшін әлеуметтік жауапкершілік аясында ескі ғимаратты бұзып, жаңа заманауи кешен салуды жоспарлаған болатын.
–Нысан әлемдік стандарттарға сай болады. Біз балалар үшін барлық қажетті жағдайларды жасаймыз. Бұл заманауи әрі қауіпсіз кеңістік болады, онда балалар жан-жақты қолдау тауып, дамуға мүмкіндік алады. Құрылыс толықтай бюджеттен тыс қаржыландырылады, яғни құрылыс салушының қаражаты есебінен. Жобаның шамамен құны 5 миллиард теңгені құрап отыр. Біз жаңа ғимарат жетім балалардың болашағы үшін маңызды қадам болатынына сенімдіміз, оларға толыққанды өмір сүріп, білім алуға мүмкіндік береді, - деді Алматы қаласы әкімінің орынбасары Әсем Нүсіпова.
«Жанұя» МК 2006 жылдан бастап жұмыс істейді, ол жетім балалар мен ата-анасының қамқорлығынсыз қалған балаларға арналған балалар үйін, 4 жастан 18 жасқа дейінгі зияткерлік кемістігі бар балаларға арналған түзету мектеп-интернатын қамтиды. Жаңа ғимараттың құрылысы келесі жылы аяқталады деп күтілуде. Бұл туралы «Жанұя» МК қамқоршылық кеңесінің төрағасы Рафаэль Гасанов айта кетті.
–Біз жаңа кампустардың құрылысын 2025 жылдың тамызына дейін аяқтауды мақсат етіп отырмыз. Біздің міндетіміз – қыркүйек айында балалар жаңа ғимаратқа көшіп, ыңғайлы жағдайда жаңа өмір бастауы үшін барлық жағдайды жасау. Бүгінгі күнге дейін «Жанұя» кешенінде 420 бала тұрып, білім алды, олардың кейбірі қазіргі уақытта арнайы интернатта, ал басқалары қалалық мектептерде оқуда, - деді ол.