1 мамыр – Қазақстан халқының бірлігі күні қарсаңында Өңірлік коммуникациялар қызметінде этномәдени бірлестіктің өкілдері қатысқан брифинг болып өтті, – деп хабарлайды aqshamnews.kz тілшісі.
«Қазақстан ұйғырларының республикалық мәдени орталығы» қоғамдық бірлестігінің төрағасы Долқунтай Әлиев этномәдени бірлестіктер қызметінің трансформациясы мен олардың Қазақстан халқының бірлігін нығайтуға қосып жатқан үлесі туралы айтып берді.
Спикердің айтуынша, соңғы жылдары этномәдени бірлестіктердің рөлі едәуір артып, қазір олар дәстүрді ғана сақтауға атсалысып қоймай, сонымен қатар қоғамдық үдерістерге де белсене араласатын болыпты.
«Біз тек мәдени мұраны сақтаумен шектелмейміз. Этномәдени бірлестіктер қоғамдық келісімді нығайтуға, жастардың бастамасын қолдап, ортақ азаматтық бірегейлікті қалыптастыруға белсене араласа бастады», – дейді.
Жастармен жұмыс істеуге көп көңіл бөлінген. Мәселен, форумдар, волонтерлік жобалар, цифрлық бастамалар мен мәдени фестивальдерді көптеп өткізсе жастарды қоғамдық қызметке тартуға мүмкіндік береді екен.
Спикер ұйымдардың қалалық және республикалық іс-шараға белсене қатысып, ұйымдастырушы әрі серіктес ретінде жұмыс істейтінін айтты. Олардың қатарында этносаралық жобалар, ашық диалог алаңдары мен онлайн кездесулер де бар.
«Қазіргі таңда бірлескен этномәдени жобалар мен өзара іс-қимылдың жаңа форматтары, соның ішінде ашық пікірталас алаңдары мен жастар қатысатын бастамалар жақсы дамып келе жатыр», – деп айтады Долқунтай Әлиев.
Оның айтуынша, алдағы уақытта Алматыда халықтар достығы фестивальдері, жастар форумдары, қайырымдылық акциялары мен Қазақстан халқының бірлігі күніне орай ұйымдастырылатын іс-шаралар өткелі отыр.