Алматы қаласы Қылмыстық-атқару жүйесі департаментіне қарасты №11 мекемеде алда келе жатқан Ұлттық домбыра және 6 шілде – Астана күні аталып өтті, – деп хабарлайды aqshamnews.kz тілшісі.
Іс-шараны мегаполистегі Жамбыл атындағы қалалық жасөспірімдер кітапханасының қызметкерлері Санжар Сейсенбаев пен Рақым Мұхамедәли ұйымдастырды.
"№11 мекемеде істі болып, жазасын өтеп жатқан жасөсіпірімдерге осындай бағыттағы іс-шараларды, кештерді жиі өткізіп тұрамыз. Себебі, олар бас бостандығынан айырылғанымен, жақсы дүниелерден, адами құндылықтардан әрдайым хабардар болып отыруға тиіс. Біз олардың әр күнінің сапалы, мағыналы өтуіне күш саламыз. Осындай кештер олардың қатарынан қалмай, қоғамға дұрыс азамат болып оралуына септігін тигізері сөзсіз", – дейді балалар колониясының тәрбие бөлімінің бастығы, әділет майоры Бағдат Талапбаев.
Іс-шара барысында кітапханашылар балаларға Астана қаласы туралы мол мағлұмат беретін кітап көрмесін ұсынды. Еліміздің бас қаласының қалыптасып, даму жолы туралы баяндап берді. Жасөспірімдер Елорда туралы қызықты викториналық сұрақтарға да белсене қатысты.
Қазақтың қоңыр үнді домбырасы туралы да қызықты деректер айтылды. Көнеден жеткен ән-күйлердің тарихы да баяндалды.
Іс-шараға белсене қатысқан балаларға сыйлыққа кітаптар ұсынылды.