Жуырда 16 жасар Жансұлтан “Қазақстан Республикасы Конституциясының 30 жылдығына байланысты рақымшылық жасау туралы" заң бойынша бостандыққа шықты.
Жансұлтанның ата-анасы ажырасып, ол інілерімен көзі көрмейтін әжесінің қолында қалады. Бала көңіл өзінің құрдастары сияқты жақсы киініп, жақсы тамақ ішуді аңсайтын. Алайда әжесінің зейнетақысы бір үйлі жанға жетпейтін. Сөйтіп әлі оң-солын танып үлгермеген 14 жасар Жансұлтан ұрлық жасап, Алматыдағы кәмелетке толмағандарды ұстауға арналған қауіпсіздігі орташа мекемесінен бір-ақ шыққан еді. Бас бостандығынан айырылған жасөспірім балалар колониясында жүріп мекеме ішіндегі орта мектепте оқыды, сондай-ақ түрлі тәрбиелік іс -шараларға белсенді қатысқаны және жақсы мінез-құлқы үшін марапаттарға ие болған.
1 жыл 3 айдан кейін рақымшылыққа іліккен жасөспірімді мекеме қызметкерлері заңда қарастырылғандай жолақысын төлеп, Маңғыстау облысындағы тұрғылықты жеріне өздері жеткізіп салуға алып кетті.
Бостандыққа шыққан Жансұлтан темір торда жүріп еркіндіктің қадірін түсінгенін және болашақта дұрыс өмір сүретінін айтып, өзіне тәлімді тәрбие берген, жарқын өмірге жол сілтеген мекеме қызметкерлері мен ұстаздарына алғысын тебірене жеткізді.