Тәуелсіздік мерекесі қарсаңында Алматы қаласының Қылмыстық-атқару жүйесі департаментіне қарасты №11 мекемеде «Тәуелсіздік деп соғады жүрегіміз» деген тақырыппен кеш ұйымдастырылды. Оған мұрындық болған №3 жалпы білім беретін мектептің ұстаздары.
«Иә, бұл мекемеде, яғни балалар колониясында бас бостандығынан айырылған жасөспірімдер жазасын өтеуде. Бірақ олардың да мерекені атап өтуге, Тәуелсіздіктің қалай келгенін, сонау Желтоқсан оқиғасының мән-мағынасын білуге құқылы. Осындай кештер арқылы олар мемлекет қамқорлығын сезінеді, осынау бейбіт өмірдің қадір-қасиетін түйсінеді, жақсы болуға ұмтылады, қателігін түзеуге тырысады деп сенеміз», – дейді кешті ұйымдастырушы химия пәнінің мұғалімі Г.Күреңбаева.
Іс-шарада Алатау ауданының «Заря-Восток» мешітінің бас имамы Қазбек Пазылбекұлы да жазалы жасөспірімдерді азамат болуға шақырып, тілегін арнады. Тәуелсіздік мерекесінің құрметіне балаларға жылы кеудеше, күртешелер, аяқ киімдер сыйлады. Және мерекелік дастарханның үстіне қойылсын деп тәтті палау, жеміс-жидек көтере келіпті.
Іс-шара соңында СӘПТЖБ бастығы әділет капитаны Шолпан Айболатқызы меймандарға мекеме бастығының атынан «Алғыс хат» ұсынды.