Алматы әкімі Дархан Сатыбалды жұмыс сапары барысында Наурызбай ауданындағы «Алма Сити-5» тұрғын үй кешенінің тұрғындарымен кездесті. Әңгіме барысында олар инженерлік және әлеуметтік инфрақұрылымға қатысты мәселелерді көтерді.
2020-2021 жылдары «Нұрлы жер» мемлекеттік бағдарламасы аясында бұл кешенде 127 көпқабатты үй салынды. Алайда электр желілері әлі күнге дейін қызмет көрсетуші ұйымдардың балансына берілмеген. Соның салдарынан 2025 жылдың басынан бері 30-дан астам апат болып, жиі ақаулар орын алған. Бұл апаттар су сорғы қондырғыларының жұмысына да кедергі келтіріп отыр.
«Мен энергетика және сумен жабдықтау басқармаларына, сондай-ақ құрылыс басқармасына желілерді үш жыл мерзімге толыққанды қызмет көрсету үшін «Алатау Жарық Компаниясы» АҚ балансына беруді тапсырдым. Бұл үдерісті жеделдету қажет», – деді Алматы әкімі. Бұл мәселені биылғы қыркүйекте шешу жоспарланып отыр. Сонымен қатар әрбір есептегіш құралын тексеруді қоса алғанда, кешенді тексеру жүргізіледі.
Тұрғындар әлеуметтік инфрақұрылымның да жайын айтты. Биыл бес жаңа мектеп пен үш балабақша ашу көзделген. Жақын күндері №202 балабақша пайдалануға беріледі. Бұған қоса, Наурызбай ауданында ерекше қажеттілігі бар балаларға арналған түзету орталығы және басқа да әлеуметтік нысандар салу жоспарда бар.
Кездесу барысында полицияның тірек пунктін орнату және учаскелік инспекторлар санын арттыру жөнінде де ұсыныс айтылды. Әкім полиция департаментіне кешен аумағында тірек пунктін ашу мүмкіндігін қарастыруды тапсырды.