Алматыда 6-7 сәуір күндері «Көлігіңіздің шығарындысын тексеріңіз» атты экологиялық акция өтеді. Оның аясында қала тұрғындары өз көлігін экологиялық талаптарға сәйкестігі бойынша тегін тексере алады, деп хабарлайды Aqshamnews.kz тілшісі.
Алматыда ауа сапасын жақсарту және жүргізушілердің экологиялық жауапкершілігін арттыру мақсатында «Көлігіңіздің шығарындысын тексеріңіз» атты арнайы акция ұйымдастырылады.
Іс-шараны «Eco Almaty» ЖШС өткізеді. Акция барысында қала тұрғындары өз автокөлігін экологиялық талаптарға сәйкестігі тұрғысынан тегін тексерте алады.
Тексеру кезінде мамандар көміртек оксидінің (CO) деңгейін және пайдаланылған газдардың түтіндену көрсеткішін өлшейді. Барлық жұмыс мобильді экологиялық зертхана арқылы жедел жүргізіледі.
Ұйымдастырушылардың мәліметінше, тексеру толықтай тегін өтеді және оның қорытындысы бойынша жүргізушілерге қатысты ешқандай әкімшілік шара қолданылмайды.
Акцияның негізгі мақсаты – көлік иелерін автокөліктің техникалық жай-күйі туралы хабардар ету, сондай-ақ шығарындыларды уақытылы бақылаудың маңызын түсіндіру.
Аталған шара Алматы қаласының атмосфералық ауаны қорғау қағидаларын іске асыру аясында өткізіліп отыр. Бұл бастама автокөлік шығарындыларын ауа ластайтын негізгі көздердің бірі ретінде азайтуға бағытталған.
Акция 2026 жылғы 6-7 сәуір күндері сағат 10:00-ден 13:00-ге дейін өтеді. Мекенжайы: Чаплыгин көшесі, 1/1, автотұрақ аумағы.